भोमरा कस झन घाम करव

नेता भासन के गोदगोदा म,
असनांदत हे अउ,
जनता भितरहिन,
आश्वासन के अंधना म,
भात रांधत हे,
राजनीति के धुरहा,
उन्ना हे,
सादा कुरथा के धंधा,
अब्बड़ जुन्ना हे,
नेता रोगहा,
चांदी के सैंतमा म,
मलई खात हे,
जनता के कई करोड़,
फ्लेक्स, पंडाल,
अउ नाचा म जात हे,
थोरकिन नव जते त,
तोर भंडारा नई झर जातिस,
फ्लेक्स अउ पंडाल के,
पईसा म,
कई गरीब तर जातिस,
फोकटाइहा खर्चा छोड़,
भुइँया म काम करव,
मनखे बर छंइहाँ बनव,
भोमरा कस झन घाम करव।